Buinore dedicade ae bale tal zei intal Salon di Onôr di Palaç Mantica, sede prestigjose de Societât Filologjiche Furlane, che e à fat di suaze ae firme dal Protocol di Intese pe comunicazion istituzionâl in lenghe furlane de
United Eagles Basketball Cividât.
Un acuardi strategjic cun protagonistis la realtât sportive di Cividât, la Societât Filologjiche Furlane e la Associazion Sportive Furlane, cun chê di promovi la presince dal furlan inte ativitât sportive tant che segnâl di
identitât culturâl e di valorizazion dal teritori, cu la cussience che chescj valôrs a van tignûts di cont e a van doprâts intai programs educatîfspes gnovis gjenerazions.
Il President de Filologjiche, Federico Vicario, al à ricuardade la impuartance de colaborazion par puartâ indevant il percors di cressite de relazion jenfri sport, lenghe e culture, intun troi za inviât cu la poie ae
ASF pe promozion identitarie e culturâl che e à puartât al sucès de selezion furlane inte Europeada 2024, il campionât di balon des minorancis linguistichis europeanis.
Adriano Luci, President dal Grup Luci e main sponsor de UEB al à marcât il passaç impuartant che al conferme l’inlidrisament intal teritori di bande de scuadre, in gracie de condivision di valôrs sportîfs fondamentâi pai
fantats: un esempli di cressite e di sium, ancje cul furlan, tant che segnâl di leam cu la proprie tiere.
Il President des Acuilis, Davide Micalich, al à ricuardât l’entusiasim spontani pe firme di un acuardi che, ancje se nol à valôr dal pont di viste economic, al è un biliet di viste pe scuadre e par dut il Friûl, intun spieli dai valôrs dal teritori che si cumbinin ben cul spirt de associazion, dal amôr pe tiere, ae voie di dâ spazi e ocasions di cressite e di agregazion ai zovins.
Micalich al à ancje ricuardât che il sport si è dimostrât mieç di trasmission sane dai valôrs furlans, ancje cul jutori concret intai moments grivis, tant che la montane tremende che l’an passât e à tocjât Romans dal
Lusinç.
Par sierâ, Daniele Puntel, President de Associazion Sportive Furlane, al à ringraciade la Filologjiche e il so rûl fondamentâl pe aventure de Europeada e al à marcât i pas concrets che si è daûr a fâ ogni an di plui bandis pe
comunicazion in lenghe furlane, poiade cun ancjemò plui fuarce e afiet di bande des comunitâts di emigrants furlans tal forest.
Ae fin, e je stade firmade la convenzion, in lenghe taliane e in lenghe furlane: un pont tal zei che al sarà dome il prin di une partide dute di zuiâ, cu lis acuilis prontis a svolâ lontan intal segn de patrie e de identitât furlane.